بسم الله الرحمن الرحيم
شهر فبراير من الاشهر اللطيفة على انه انقضى على عجل كان فيه ذكريات وايام
لطيفة وسعيدة الحمدلله وايضا بديت اسوي تجارب لبعض الاكلات لرمضان الله يبلغنا
اياه.
يلا نبدا تفاصيل شهرنا السعيد :::
اول شي جربته هذا الشهر هو المعجنات من دون
اي اضافة منتجات حيوانية
والحمدلله النتيجة طلعت افضل مما توقعت وطبعا
سويت زعتر لي وجبن لباقي اهل
البيت ،،، الحمدلله ماحسوا بفرق ابدا ونفس
العجينة اللي فيها حليب ولبن …
مقادير العجينة للي حابب يجربها :::
٣ اكواب دقيق سواء ابيض او بر
ثلث كوب زيت نباتي
م ك خميرة
م ص بيكنج باودر
م ص سكر
م ص ملح
كوب ماء دافي وممكن الزيادة في حال الحاجة
توضع جميع المقادير مع بعض وتعجن بعدين تترك
تتخمر لمده ساعة
واخيرا تشكيلها وحشوها باللي تحبون …
وبالعافية …
******
جداً كان ملهم وجاء بوقته تقدمه د.افنان
الغامدي ويتكلم عن مواضيع نفسية واجتماعية
ومفاهيم متنوعة ،،، مرة حلوة ومو طويلة مدت
الحلقة تقريبا نص ساعة
وقليل ماتتعدى النص ساعة ،،، اسمعوه ومتاكدة
انه بيعجبكم …
******
من الاشياء الحلوة واللطيفة بهالشهر هو يوم التاسيس …
زرت فيه سوق نجناج بساحة العروض
عبارة عن خمس اقسام يخص مناطق المملكة
وهي الوسطى والشمالية والغربية والجنوبية
والشرقية ،،،
وكل شي يخص هالمناطق من اكل وسوق وثقافتهم
بعد حتى عرضاتهم ،،،
اكثر شي كان يحمس بالسوق العرضات تجنن
حبيت اكثر شي الوسطى طبعاً
هذي العشق مع طق الطبول والكلام الرهيب
بعدها الغربية تجنن
الشمالية مو مرا حبيتها والجنوبية
والشرقية نفس المستوى
احب السعودية وكل شي فيها …
هالشهر استغليت كود خصم التاسيس
وطلبت لي اكواب من اوتا كانت بخاطري من
زمان كوب الفيل باللون الرمادي الفاتح
اذكر كنت حاطه الغامق بس كيف صار فاتح
مدري المهم الشكل يجننن ،،،
والكوب الاصفر خطير والاصفر مع الاسود فخم
بعد ،،، كلهم حبيتهم ويجنون …
واضح اني استغليت يوم التاسيس صح
لقيت حدائق السلطان مسوين عروض على
نباتاتهم فطلبت نبتة اجلونيما كانت
بخاطري من زمان ومعها نبتيتين بصراحة
ما اعرف عنهم شي بس بحاول اخليهم على
قيد الحياة ،،، زيادة حبيت شكلهم بعد…
******
هالشهر قريت كتاب واحد فقط بعنوان
قبل ان تبرد القهوة ،،، يتكلم عن مقهي
باليابان لكن مو اي مقهي فيه ميزة انو
تقدر تقابل اشخاص راحوا من حياتك في الماضي
وتتحاور معهم وتقول اللي بخاطرك ولاقدرت
تقوله
لهم من قبل ،،، تناول اربع قصص باشكال
مختلفة
عن ام وابنها وزوج وزوجته وعن صديق وصديقته
ورجل يحب امراءة لكن لم يتزوجها مره حبيت
الفكره ضروري تقول كل اللي تبيه قبل يبرد
فنجان القهوة
الموجود على الطاولة ،،، القصص رهيبة مره
وبخاطري لو انها حقيقة
واجربها واقابل جدتي واقولها اشياء بخاطري
لانها توفت وانا صغيرة
وما استمتعت بحنان الجدة ابدا ،،،
اعطيها ٤\٥
الى هنا تنتهي تفاصيل فبراير السعيدة الحمدلله
كان شهر جميل ولطيف وخفيف
اشوفكم بتفاصيل الشهر القادم باذن الله
دمتم بسعادة 💛
insta:: ebtesamabdulla
تعليقات
إرسال تعليق
اكتب لي تعليقا عن رائك في البوست الجديد ؟؟