بسم الله الرحمن الرحيم
بدت سنة جديدة ومتفائلين خير فيها باذن الله سعيدة جدا بهذي السنة
فيها امور حلوة بتصير ونقول يارب تصير مثل مانبي …
والحين بنبدا تفاصيلي السعيدة هذا الشهر
شهر مليان لحظات حلوة من اول يوم ولله الحمد
ومن سعادتي بالشهر سميتة الشهر الاخضر
كل شي واغلب الاشياء اللي استخدمتها هالشهر كان لونها اخضر …
******
.
اللون الاخضر بدء بقوة وكملتها بالكوب الاخضر من متجر سلة قهوة طلبته من شهر
سبتمبر اتوقع مع كوب اصفر ولكن هالشهر استخدمته بزيادة حجمه كبير ويناسبني
كشخص يحب الشاي 😩
******
والاخضر مكمل معنا بكتاب الرائع نجيب محفوظ ) حكايات حارتنا (
الكتاب يتكلم بشكل بسيط عن قصص صارت بحياة طفل يرويها بنفسه واحداث تصير
معه يوميا وهي عبارة عن ٧٨ قصة او حكاية والاحلى كل وحدة عن شي مختلف
حبيت تنوع القصص فيها والنهايات اغلبها حزينة للاسف ،،
الاسلوب سهل والكلمات واضحة ما فيه شي صعب
الكتاب يمدي تخلصينه بوقت صغير وعدد صفحاته ١٦٣ صفحة
اعطيه ٥\٥
******
ثاني كتاب هالشهر رواية اربطة للكاتب دومينيكو ستارنونه
ايطالي ومترجمة للعربية ،، مره حلوة قصتها عن علاقة باندا والدو الزوجية
اللي فيها من الروتين والمحن الكثير ،،، وفي لحظة يصير حدث يقلب حياتهم
وهو انفصال الاب عنهم ،،، الرواية تتكلم عن الحب والعائلة ونتائج افعالنا
على المدى الطويل ،،، الاسلوب سهل وسلس ومقسمه على ثلاث فصول وكل فصل مقسم
ايضا حبيت الكتاب جدا …
اعطيه ٥\٥
******
وجبة الشهر الصراحة مكرونه الطيبين الحمراء ،،، اخذت طريقتها من حساب رياض
الخالد ،،، سهلة وبسيطة والاهم انها لذيذة
،،، طبعا انا سويتها بدون لحم لاني مو من اكلي اللحوم …
هذا رابط الوصفة جربوها حلوة للعجازين او اللي ماله خلق يسوي شي بلغاويص
https://www.instagram.com/p/B028018BVQ3/?utm_medium=copy_link
******
الشهر هذا مرة حلو بسبب الامطار والاجواء الحلوة الحمدلله
استغليت الاجواء بكل صدر رحب وخليت اطفالي يلعبون تحت المطر
لاني اشوف متعة المطر باللعب تحته او المشي ،،، كانت اوقات
حلوة يارب تنعاد …
******
حطيت بداية هذي السنة هدف وهو اني اتعلم واحاول كل شهر
اسوي شي جديد ماعمري سويته من قبل عشان اشوف هالشي بيكون
حلو لي او لا وهل بيطلع الطاقة السلبية اللي تكون موجودة
في بعض الايام ،،، وتجربة هالشهر اتعلم التطريز وحبيت ابدا
باسمي وطرزته بشكل حلو الحمدلله ومتحمسه اخلص اللوحة واوريها
لكم بس كشي جديد علي كانت تجربة جميله وانغمست فيها مرااا
الاغراض طلبتها من شي ان وهذا رابطها ::
******
احلى شي صار هالشهر هو طلعتي الصباحية مع صديقاتي وكان الجو حلو الحمدلله
رحنا لمطعم في ذا زون اسمه joy cafe وطلبنا من عندهم فطور لذيذ احس اي شي
مع الجمعة
يطلع حلو اكلنا وسوالفنا وغيرنا جو مع اجازة المدارس الحمدلله …
******
ثاني شي جربته هالشهر الهوت تشوكلت من تيم هورتنز وتشوكلت ملك
والحمدلله كلهم حلوات وحلاهم متزن مو حالي مره ولامر كان لذيذ
طبعا يفوز حق تشوكلت ملك كان الذ نقطة من تيم هورتنز
جربوهم وعلموني ايش افضل …
******
وبكذا خلصنا شهر يناير بتفاصيل سعيدة وايام حلوة الحمدلله
واتمني كلكم كذا ،،،
لاتنسون تابعوني على الانستقرام ::
اشوفكم الشهر الجاي باذن الله
دمتم بسعادة
تعليقات
إرسال تعليق
اكتب لي تعليقا عن رائك في البوست الجديد ؟؟