تفاصيل سعيدة في اكتوبر :)

بسم الله الرحمن الرحيم 

 هالشهر تاخرت جدا بكتابة تدوينة تفاصيل سعيدة في اكتوبر بسبب ضغط العمل والحالة الصحية اللي امر فيها ،، واللي اخرني زيادة جمال الجو والتامل فيه بس تحديت نفسي قبل انتصاف شهر نوفمبر اني انزل تدوينه واقدر اقول الحمد لله وفيت بوعدي ... 

يلا نبدا .. 

**********

مسكارا total temp من ميبلين 

ميزة هذي المسكارا ان فيها جوز الهند من مكوناتها فاول ماعرفت هالمكون تحمست جدا اجربها واشوف نتيجتها على رموشي ،، الحمدلله كانت التجربة موفقة جدا ،، تعطي الرموش من طبقة وحدة كثافة طبيعية وطول طبيعي ايضا واذا حطيتي طبقة ثانية تزيد كثافتها ،، والاهم من هذا كله انها ماتقطع الرموش ابدا تنزل مع المزيل بكل سلاسة ،، تعتبر من المسكرات اللي مو ضد المويا ،، استخدامي لها يوميا للدوام تكفي وتوفي بصراحة ،، سعرها ٦٠ ريال او قريب منها 

هذي صورة اقرب للفرشة مثل ماتشوفون من الامام شعيرات قصيرة وتزداد طول كل ماقربنا للنهاية عشان تضمن لك 

ان كل رمش وصله مسكارا .. 

**********

كوب مشروبات من ميني سو ..

حبيت شكله مرااا وزياده الكلام اللي عليه جدا ملهم ورائع ،، طبعا مايحفظ البرودة ولا الحرارة 

لكن حلو لاستمتاع للحظة حطيت فيه مشروب بارد بس اكثر شي استخدمه للمويا مجرد اعبيه واحطه على مكتبي لاني اكثر مكان اجلس عليه فحبيت يكون بجنبي المويا بشكل دايم ،، سعره ١٦ ريال 

**********

الراميون الكوري  ( شن راميون ) 

جربت انواع كثيرة من الراميون لكن هذا اكثر واحد فاز عندي من ناحية الطعم والبهارات ،،،

ادمنته هالشهر بزيادة لما عرفت محل قريب من البيت يوفره فصار وجبتي اليوميه اما غداء او سناك او عشاء على حسب 

،،، والاهم انو سريع وماتحتارين بوصفاته مجرد خضار معه ويصير اطلق طعم .. 

طريقة عمله مويا حارة بقدر متوسط الحجم وتحطين المكرونة عليه احسبي خمس دقايق وحطي البهارات وحركيه 

وطفي النار لانه كل ماطول بتنتفخ المكرونه ويصير طعمها مو حلو ) انا احط نص البهارات لانه مراااا سبايسي (( 

وبالعافية ..

**********

حللت دم في نص الشهر وطلع عندي فقر دم حاد فبحثت عن اكل يسرع ارتفاع الدم ويرجعه طبيعي فلقيت افضل حل الشمندر وله عدة طرق اما عصير او سلطة او تخلطينه مع اي شي وتمشي امورك ،، انا سويته سلطة وصارت عشاي طول الشهر لذيذه ومشبعة والاهم ماتحسين انو في شي جالس على كبدك ،،،

مكونات السلطة جدا سهله والاكيد متوفرة بكل بيت :: 

شمندر مبشور 

جرجير مقطع شرائح 

خس امريكي او عادي مقطع شرائح

بقدونس مفروم 

رجله اختياري 

اخلطهم مع بعض واحط عليهم نص ليمونه معصوره + شوي ملح + ربع ملعقه زيت زيتون واقلبهم مع بعض واحطهم في صحن شكله حلو عشان تنفتح نفسك للاكل 

وبس نستمتع بالطبق وبالعافية ...

**********

من قنوات اليوتيوب الملهمه واللي لها تاثير حلو هي قناة بدور ،،

طحت عليها لي اسبوعين قناتها تقريبا عن التشافي وتطوير ذات وكتب وقليل من الفلوقات ،،

جدااا لطيفة قناتها ومستحيل ماتشوفين فيديو لها من غير ماتستفيدين ولو بالشي القليل والاهم ماتطفشين من الفيديو لما تتابعينه ،، تابعوها وعطوني رايكم ...

هذا رابط قناتها :: https://www.youtube.com/channel/UCLgPmO7ioXNt-_QsZHS6CVw/videos

***********

ومن اجمل التفاصيل السعيدة بهالشهر هي وجود الغيوم وهطول الامطار 

هذي من اهم السعادات اللي بهالشهر يكفي انها سبب اساسي لتغيير المزاج وتحويله من سئ الى سعيد ،، وايضا سبب من اسباب التامل والاسترخاء 

يكفي مشاهدة السحب وهي تتحرك من مكانها لمكان اخر تحسينها تسحب كل الطاقة السلبية اللي فيك وتحط مكانها طاقة ايجابية وسعادة ...

**********

ومن اهم التفاصيل اللي حصلت بهالشهر اني زينت الحوش حقي 

فحسيت ان جوي كله تغير والنفسية صارت احلى مع تغير المكان ،،

فشريت ثيل بمقاس الحوش وجبت نبتات وطبليات حطيتها بالوسط ،،

وفرشت مفرش اصفر عشان تعطي سعادة للي جالس ،، ما احس اني خلصتها مراا

بس راضيه بالنتيجة اللي حصلت عليها ،، 

صار اغلب يومي جالسه فيه ومع هطول المطر زاد السعادة عندي 

**********

هذي من اكثر التفاصيل السعيدة اللي مرت علي هالشهر 

مرااا حبيت هالشهر بكل مافيه كان شهر جميل ،،، 

وعقبال نوفمبر يارب يكون اجمل وافضل من الشهور السابقة ..

دمتم بسعادة <<<

للتواصل معي ::

INSTA: ebtesamabdulla

TWITTER: ebtesamabdulla

SNAP: ebtesamabdulla9

youtube:ebtesamabdulla