اشياء بسيطة تمنحي السعادة :)

بسم الله الرحمن الرحيم 

كل شخص في الحياة عنده اشياء عديدة تسبب له السعادة اما بسيطة او كبيره وانا من الاشخاص اللي تسعدهم الاشياء البسيطه وتدخل السعاده بقلوبهم وتوصل لابعد مستوى وفي هذي التدوينه حبيت اشارككم سعاداتي :: 

يلا نبدا :: 

١/ الاكواب ثم الاكواب ::

شعور متجدد مع كل كوب اشتريه او يجيني كهديه وحب عظيم لهم ويعتبرون من اهم اسباب السعاده لي كل كوب مرتبط بمشاعر معينه وله وقت معين وذكرى حلوة كمان  ،، والاهم كل كوب مرتبط بمزاج معين :) 

******************** 

٢/ اللون الاصفر  ::

هذا اللون السعيد اللطيف بالنسبه لي وودي اسوي حزب للاشخاص اللي يحبونه لانهم جدا قليلين اللون يفتح نفسك ويخليك مبسوطه حتى لو كنتي متضايقه ،،، بيتي حرفيا كل زاويه فيه تحفه او قطعه بهاللون احس بالانتماء لما اشوفه ،، والاهم لما اجي اتكلم عنه فيه شعور يخليني اطير من السعاده وبعدها مقدر اتكلم عنه /// والاهم ان الناس صارت تعرف اني احب الاصفر اصبح يرمز لي باي طريقه وصارت هداياي بهذا اللون لااحكيكم اي سعاده صايره اعيشها مع هاللون .. 

******************** 

٣/ الغيوم والامطار ::

عاد هذي تغير جو اللي مايتغير وتخليك مبسوطه مجرد ماتشوفينها انا لو اطلع من الدوام معصبه وشايله هم الدنيا وبس اشوفها قسم بالله كل هذا يروح بلحظة شوفتي لهم او اشم ريحة المطر لها ذكريات سعيده واوقات جميله ...

******************** 

٤/ الصباح ::

اجمل شي في الحياة بدايات الصباح والصباح بشكل عام الى الساعه ١١ وقت مثالي تجلسين فيه مع نفسك وتسوين اللي تحبين وقت روقاني ومستعده اقوم من النوم عشان استمتع فيه ...

******************** 

٥/ الكوريين ::

اكثر سؤال يجيني ليه احبهم ؟؟ لانهم ناس منظمين مرتبين وانيقين وناس هاديه كل شي فيهم جميل ويحسسك بالحياة ،، لاحد ينكر هالشئ متعه لما اشوف مسلسلاتهم او اليوتيوب اعيش جوهم بقوة وتجيني افكار اني اروح اعيش فتره عندهم يارب تتحقق هالامنية ..

******************** 

٦/ قراءه كتاب مهلم ::

قمت سعادتي لما اغوض في كتاب واتخيل كل كلمه فيه وابحر الى عالم اخر الكتب عالم ممتع والي ماتقراء فاتها كثير ،، لما اكون مضغوطة او مهمومة اهرب من عالمي المزعج احيانا اليهم .. 

******************** 

٧/ الاكل ::

فيه انواع معينه تدخل السعاده علي وتخليني طايره فوق هام السحب كانه شي دخل جسمي ويخدرني الى ابعد درجة ،،خاصه اذا جلست اكل واتفرج هنا وصلت القمة ،، الحمدلله على وجود نعمة الاكل في حياتنا 

******************** 

٨/ كلمة لطيفه ::

لما اكون مضغوطة او مهمومة ويجني احد يقولي كلمة بسيطه ممكن تزيح عني جبل كبير من الهم او الحزن ،، الكلمات لها تاثير عجيب عاد اذا كانت كويسه شوفوا السعادة اللي تجلبها .. 
من الكلمات السعيده اللي سمعتها  ) الاصفر لايليق الابك ( 

******************** 

٩/ الهدايا ::

اي شي يجيني احبه وادخل في هيام معه ومع صاحبه احس بتقديره لي لو كان شي بسيط مايذكر لكن تذكره لي يكفيني ،، طبعا الكل يعرف مقدار السعاده لما توصل هديه باسمك اووووووه ... واخر الهدايا اللي وصلتني كوب عصير ورواية :) 

******************** 

١٠/ الاسترخاء ::

انا انسانه اميل للهدوء والوحدة عادي جدا اجلس الويكند بالبيت بس اهم شي اكون في قمه هدوئي واسترخائي شمعه وصوت جميل وظلام اقدر اقول وصلت لاعلى مستوى من الاسترخاء اللي يعيد لي طاقتي ويخلني افضل ... 

******************** 

١١\ افلام ديزني :: 


مايحتاج اتكلم عن السعاده والفرح اللي يغمرني لما اشوف فيلم لديزني جدا شعور بطل يرجع لي ذكريات لطيفه عشتها بسعاده ... 

******************** 

كانت هذي قائمتي لاشياء تمنحني السعادة ،،، ممكن تكون في نظركم شي بسيط والبعض الاخر يظنه تافه لكن بالنسبه لي عالمي الجميل اللي مستحيل يخلو يوم منه الحمدلله ....

شاركوني الامور اللي تسعدكم وهل تتفقون معي او لا // 

دمتم بسعادة :)

للتواصل معي :: 

INSTA: ebtesamabdulla

TWITTER: ebtesamabdulla

SNAP: ebtesamabdulla9

youtube:ebtesamabdulla