ماذا يوجد في حقيبتي ؟؟

بسم الله الرحمن الرحيم 

كيفكم مع العيد واجواءه  ؟؟ 

هذا البوست كان ودي انزله من زمان يعني مع بدايه الدوامات بس ماكان عندي وقت ابدا

ويوم عطلت امس بديت فيه فقلت انزله لكم اليوم 

 حبيت يكون عن الاغراض الموجودة في شنطتي للدوام لان اغلب الايام ما اروح ولا اجي فيكون العفش واحد حتى لو طلعت لمكان معين 

يلا نبدا 

هذا العفش الموجود بالشنطه يمكن اغلبكم يشوفه كثير بس كل شي احتاجه ::)

اول شي واهم شي المويا مستحيل اطلع من البيت بدونه لاني من النوع اللي اعطش كثير فلازم يكون معاااي 

ثاني شي البلانر ليه مهم عندي لانو تطلع لي اعمال ومواعيد فلازم اسجلها على طول واشوف بعد الاعمال اللي عندي واخلصها فاحسه مهم 

هذا نوت صغير اكتب فيه كل غرض ابغاه من برى او البوستات اللي ببالي او فكرة عندي والستكيرس عشان البلانر 

هذا مهم بعد لاني اتعقد اذا انقطع شي او طاح الزرار وخاصه لوكنتي بزواره او عزيمه لازم احتياط للطوارئ 

معقم للايدين لاني امسك اشياء كثيرة ومع هالامراض المنتشرة لازم الواحد يعقم ايديه كل شوي ،، مناديل ،، مشط ،، مشط ثاني عشان يفك التشابك ويسهل علي تمشيط شعري من بودي شوب ،،مرااايه طبعا ،، واخر شي الكريم من باث اند بودي ترطيبها حلو جدا ويقعد معي وقت .. 

هذا اللي ما اقدر اطلع من البيت من دونه الراوتر حبيب الكل ..

عطر جوفان بالمسك الابيض ،، لي فتره طايحه فيه اخذته من درعه للعطور ريحته جميله وتنفع لكل مكان عاد انا من عشاق المسك .. 

السماعات والباق حقها اللي خلاها ما تتعقد ..

حقيبة الميك اب 

هذي محتوياتها اشياء خفيفه وبسيطه 

مسكارا ، ايلاينر ، كونسيلر ، بلاش ، روجين 

هذي اسميها شنطه الطوارئ 

محتوياتها :: فازلين الحجم الصغير ، فازلين الشفايف ، لب باتر للشفاه، لابيلو بالتوت ،، لو تلاحظون اغلب اللي فيها لشفايف عشان شفايفي دايما جافه >> غارنيه للهالات السوداء ، بنس للشعر ، مسحه طبية ولاصق جروح لو صار شي لاسمح الله ،، اعواد اذان ،، فرش صغيره للضرورة ،، مناديل خاصه بانظارات ..

                                  وبس كانت هذي كل محتويات شنطتي حوووسه صح >> كل شي مهم ::)

اتمنى عجبكم البوست وحبيتوه
هاليومين قاعده اخطط لبوستات ان شاء الله انكم تحبونها

لاتحرموني من ارائكم وتعليقاتكم
وشكراااا